Magistratura
Ümumi məlumat
BANM-İn Biznesin İdarə Olunması üzrə Tədris Mərkəzinin (MBA) əsas məqsədi yüksək ixtisaslı və beynəlxalq səviyyəli idarəçilər yetişdirməkdir.
MBA proqramı əsas və seçmə fənlər əsasında tərtib edilmişdir.Tədris ölkənin tanınmış idarəçiləri və müxtəlif şirkətlərin menecerləri tərəfindən həyata keçirilir. MBA proqramı üzrə tədris həm azərbaycan, həm də ingilis dilləri üzrə aparılır. Proqram çərçivəsində tədris edilən əsas fənlərə kapital qoyuluşu və maliyyə strategiyaları, liderlik və təşkilati davranış, biznes və iqtisadiyyat üçün statistika, marketinq menecmenti, strateji idarəetmə, korporativ maliyyə, insan resurslarının idarə olunması, maliyyə uçotu və s. daxildir. Bu fənlərdən əlavə proqrama tələbələrin müxtəlif sahələrdə biliklərini genişləndirməsi üçün öz maraqlarına uyğun seçmə fənlər də daxildir ki, bunlar da beynəlxalq idarəetmə, biznes münasibəti, risklərin idarə olunması, strateji insan resurslarının idarəedilməsi və digər bu kimi fənləri əhatə edir.
MBA proqramı üzrə tədris 90 və 120 kreditlik təhsil proqramları üzrə aparılır. 120 kreditlik proqram üzrə təhsil alan tələbələr tədrisin son ilində akademik tədqiqat bacarıqlarının artırılması məqsədilə elmi-tədqiqat təcrübəsi keçirlər və magistratura dissertasiyası təqdim edirlər.
Biznesin İdarə edilməsi üzrə magistratura proqramı ən son dünya standartlarına uyğun hazırlanmış innovativ və rəqabətcil bir tədris proqramı olaraq tələbələrə biznes və idarəetmənin müxtəlif sahələrini dərindən mənimsəmək, həm nəzəri, həm də praktiki biliklər əldə etmək imkanı yaradır.
Proqramın təlim nəticələri
MBA proqramını bitirəndən sonra məzunlar aşağıdakı bacarıqlara malik olacaqlar:
➡️ İdarəetmə, maliyyə, mühasibat uçotu, marketinq, iqtisadiyyat və rəqəmsal texnologiyalar üzrə qabaqcıl bilikləri sintez edərək sistematik təşkilati problemləri təhlil etmək, innovativ və transformativ həllər hazırlamaq, onların tətbiqinə rəhbərlik etmək.
➡️ Dinamik və qeyri-müəyyən biznes mühitində səmərəli qərarların qəbulunu təmin etmək məqsədilə maliyyə, bazar, əməliyyat və beynəlxalq xarakterli məlumatları strateji yanaşma əsasında təhlil etmək, qiymətləndirmək və şərh etmək.
➡️ Davamlı rəqabət üstünlüyünün və uzunmüddətli təşkilati uğurun təmin edilməsi məqsədilə rəqabət mühitinin təhlili, innovasiya çərçivələri və biznes analitikası alətlərindən istifadə etməklə mürəkkəb strateji planlar hazırlamaq, əsaslandırmaq və qiymətləndirmək.
➡️ Kapital investisiyaları, qiymətləndirmə və strateji maliyyə planlaşdırılması üzrə qərarların qəbulunu dəstəkləmək məqsədilə maliyyə idarəetməsi, investisiya və korporativ maliyyə sahələrinə aid qabaqcıl alət və metodları qiymətləndirmək və tətbiq etmək.
➡️ Təşkilatın strateji fəaliyyətinə Korporativ Sosial Məsuliyyət (CSR) və Ekoloji, Sosial və Korporativ İdarəetmə (ESG) meyarları, eləcə də dayanıqlılıq prinsiplərini inteqrasiya etməklə etik, məsuliyyətli və riskləri nəzərə alan qərarvermə yanaşmalarını formalaşdırmaq və təşkilati səviyyədə möhkəmləndirmək.
➡️ Müxtəlif mədəni və beynəlxalq mühitlərdə liderlik, təşkilati davranış, danışıqların aparılması, istedadların idarə olunması və dəyişikliklərin idarə olunması sahələrində qabaqcıl yanaşmaları tətbiq edərək fərdlərin və komandaların fəaliyyətinə rəhbərlik etmək, onların motivasiyasını və inkişafını təmin etmək.
➡️ Müasir əməliyyatların və strateji xərclərin idarə olunması alətlərini tətbiq etməklə biznes proseslərinin və əməliyyatların formalaşdırılmasını, idarə olunmasını və davamlı təkmilləşdirilməsini təmin etmək, bununla da təşkilati səmərəliliyin və effektivliyin artırılmasına töhfə vermək.
➡️ Davamlı və innovativ nəticələrin əldə olunması məqsədilə beynəlxalq mühitdə proqram və layihələrin idarə edilməsi çərçivələrini tənqidi şəkildə qiymətləndirmək və onların tətbiqinə rəhbərlik etmək.
➡️ Təşkilati nəticələri qiymətləndirmək və sübutlara əsaslanan idarəetmə qərarları üçün tövsiyələr hazırlamaq məqsədilə uyğun tədqiqat metodlarından və statistik təhlil alətlərindən istifadə etmək.
Tədris sahələri
BANM-in MBA Mərkəzinin əsas missiyası qlobal səviyyədə rəqabətədavamlı, yüksək ixtisaslı menecerlər yetişdirməkdir. BANM-də MBA proqramı həm Azərbaycan, həm də ingilis bölmələrində həyata keçirilir.
Azərbaycan bölməsi üzrə MBA proqramı aşağıdakı ixtisaslaşmalar üzrə tədris olunur:
• Biznesin təşkili və idarə edilməsi (layihələrin idarə olunması)
• Biznesin təşkili və idarə edilməsi (maliyyə)
• Biznesin təşkili və idarə edilməsi (insan resurslarının idarə olunması)
• Biznesin təşkili və idarə edilməsi (ümumi idarəetmə)
İngilis bölməsi üzrə MBA proqramı isə aşağıdakı ixtisaslaşmalar üzrə tədris olunur:
• Biznesin təşkili və idarə edilməsi (layihələrin idarə olunması)
• Biznesin təşkili və idarə edilməsi (maliyyə)
• Biznesin təşkili və idarə edilməsi (insan resurslarının idarə olunması)
BANM-də MBA təhsilinin üstünlükləri
- Proqramın üstünlükləri
Bu proqramda tələbələr idarəetmə və biznesin müxtəlif sahələri üzrə bilik və bacarıqlar əldə edəcəklər.
Bakı Ali Neft Məktəbi bu bilik və bacarıqların qazanılmasında sizə öz qapılarını açır. BANM digər proqramlarda qazandığı uğurları eyni zamanda MBA proqramında da tətbiq edir. Kurslarımız olduqca praktik və əhatəlidir. MBA proqramını tədris edən şəxslər isə SOCAR və digər bu kimi iri transmilli şirkətlərdə çalışan rəhbər vəzifəli şəxsləridir.
- Rəqabətədavamlı karyera imkanları
BANM-in karyera mərkəzi tələbə və məzunları dünyanın sürətlə inkişaf edən transmilli şirkətləri ilə əlaqələndirir. Eyni zamanda bu proqramda təhsilini tamamlamış tələbələr Beynəlxalq MBA dərəcəsinə tam yiyələnəcəklər. Tədris proqramına Strateji İdarəetmə, Marketinq, Statistika, İnvestisiya və digər fənlər daxildir. Bu akademik və praktiki bilikləri əldə edən şəxslər məşğul olduqları və ya artıq sahib olduqları biznesi daha da inkişaf etdirə biləcəklər.
- Əlverişli (münasib) dərs qrafiki
Bakı Ali Neft Məktəbinin MBA proqramına müraciət edənlərin əksəriyyətinin müxtəlif sahələrdə çalışdıqlarını nəzərə alaraq, dərslərin həftədə 3 dəfə olmaqla, axşam saatlarında təşkil edilməsi planlaşdırılır.
- Akademik mükəmməllik
MBA proqramı tələbələrə zəngin innovativ və praktiki biliklər vəd edir. Belə ki kurikulum və dərs vəsaitləri dünyaca tanınmış akademik heyət tərəfindən yalnız Bakı Ali Neft Məktəbi üçün hazırlanıb. Proqrama qəbul olan tələbələr öncədən xüsusi hazırlanmış dərsliklər və digər köməkçi vəsaitlərlə təmin ediləcəklər.
- Azərbaycanın ən qabaqcıl universitetində təhsil almaq imkanı
BANM məzunların işlə təmin olunmasına görə ölkə birincisidir. Belə ki ali məktəbi bitirən məzunların böyük əksəriyyəti işlə təmin olunub. Bu uğur zəngin akademik və inzibati heyətin səyi nəticəsində ərsəyə gəlib. BANM eyni nüfuzu MBA proqramı vasitəsi ilə daha da genişləndirmək niyyətindədir.
- Geniş professional biznes əlaqələri (networking imkanları)
MBA proqramını seçən tələbələr Ali Neft Məktəbinin dünyanın tanınmış transmilli şirkətlərində çalışan məzun və müəllim şəbəkəsinə qoşulmaqla biznes əlaqələrini genişləndirmək imkanı əldə edirlər.
- Azərbaycanın ən tanınmış mütəxəssislərindən praktiki biliklər almaq imkanı
Azərbaycanın və eləcə də, dünyanın öndə gedən qurumlarının (SOCAR, BP, dövlət təşkilatları və s.) tanınmış mütəxəssisləri və rəhbər vəzifəli şəxsləri BANM-in MBA tələbələrinə dərs demək üçün dəvət ediliblər. Bununla tələbələr yalnız nəzəri deyil, eyni zamanda real təcrübələr haqqında biliklərə də yiyələnirlər.
- Yüksək texnoloji laboratoriyalarla təchiz olunmuş möhtəşəm kampus
MBA tələbələri BANM-in yeni və ən son standartlara cavab verən kampusunda yerləşən geniş şəraitdən istifadə etmək imkanı əldə edirlər. Buraya zəngin kitabxana, yüksək texnoloji laboratoriyalar, idman zalları, üzgüçülük hovuzları, oyun meydançaları və digər imkanlar daxildir.